Milli komandamız və Rahid Əmirquliyev İtaliyanın "tuttomercatoweb.com" saytının suallarını cavablandırıb. Sportarena.az həmin müsahibəni təqdim edir:
- Seçmə mərhələnin ilk oyununda İtaliyaya 1:2 hesabı ilə uduzduğunuzoyundan sonra millimiz haqda sizdə hansı fikir formalaşıb?
- Düşünürəm ki, İtaliya dünyada ən güclü milli komandalardan biridir. Ötən il bu komandaya 1:2 hesabı ilə uduzduq. Çünki onların səviyyəsi göz qabağındadı. Ancaq bu dəfə biz Bakıda, yeni stadionda doğma azarkeşlərimiz önündə oynayacağıq. Bu dəfə bir çox şey bizim tərəfimizdə olacaq. Stadiondakı atmosfer bizə kömək edə bilər. Bilirik ki, asan oyun olmayacaq. Ancaq biz xalqımızı sevindirmək üçün əlimizdən gələn hər şeyi edəcəyik.
- Robert Prosineçki gələndən sonra Azərbaycan millisi bir neçə yaxşı nəticə qazandı. O, gələndən sonra nə dəyişdi?
- Çox şey dəyişdi: biz daha sərbəst oynamağa, topla daha çox davranmağa, topa daha çox sahib olmağa başladıq. Hər şeydən öncə isə biz hücumda oynamağa başladıq.
- Azərbaycanda Avropanın güclü çempionatlarında oynaya biləcək futbolçular var?
- Bizdə futbol nəzərə çarpacaq dərəcədə sürətlə inkişaf edir. İki komandamızın Avroliqanın qrup mərhələsində olması da bu faktı təsdiq edir. Fərdi keyfiyyətlərə qaldıqda isə, bizdə potensiala malik çox yaxşı futbolçular var. Tezliklə azərbaycanlı futbolçular İngiltərə, İspaniya və İtaliya çempionatlarında çıxış edəcəklər.
- İtaliya millisində heyran olduğunuz futbolçu varmı?
- Ad çəkmək çətindir. Çünki futbol komanda oyunudur. Ümumilikdə isə İtaliya çox güclü yığmadır. İnkar eləmək olmaz ki, hazırda İtaliya millisinin heyətində çox sayda səviyyəli futbolçular var.