"Avvro-2016"nın seçmə mərhələsi çərçivəsində sabah Bolqarıstan yığması ilə üz-üzə gələcək millimizin baş məşqçisi Robert Prosineçki mətbuat konfransı keçirib. Sportarena.az xəbər verir ki, seçmə mərhələnin son oyunu ilə bağlı fikirlərini açıqlayan xorvatiyalı mütəxəssis jurnalistlərin suallarını cavablandırıb:
- Bütün komanda oyuna ciddi hazırlaşıb. Yaxşı nəticəyə imza atmaq istəyirik. Rəqibin heyətində sürətli oyunçular var. Biz onları yaxşı analiz etmişik. İtaliya ilə çətin oyundan sonra bu görüşdə yaxşı nəticəyə imza atmaq istəyirik. Bolqarıstan millisinin Xorvatiya ilə görüşünü təhlil etmişəm. Kompakt oyun sərgiləyirlər. Yaxşı futbol göstərmək və sərfəli nəticə əldə etmək üçün əlimizdən gələni edəcəyik.
- Adətən oyundan öncə heyəti açıqlayırsınız.
- Üç mövqedə dəyişiklik edəcəyik. Kamran Ağayev, Məhəmməd Mirzəbəyov, Ruslan Abışov, Maksim Medvedyev, Rəşad Sadıqov, Qara Qarayev, Rahid Əmirquliyev, Dmitri Nazarov, Əfran İsmayılov, Elnur Cəfərov, Ruslan Qurbanova start heyətdə şans verəcəm.
- Bolqarıstanlı azarkeşlər sabahkı oyuna az maraq göstərir. Bu, Azərbaycan millisinin səfərdən xalla dönməsinə nə dərəcədə kömək edəcək.
- Biz futbolu azarkeşlər üçün oynayırıq. Əgər bilet az satılıbsa, buna təəssüf edirik.
- Xorvatiya ilə oyundan sonra rəqib komandanın baş məşqçisi istefaya göndərildi. Sabahkı oyunla da digər həmkarınızı yola sala bilərsiniz?
- Bu barədə fikirləşmək istəmirəm. Mən hər bir oyunu udmaq istəyirəm. Amma kimin istefa verəcəyini fikirləşmirəm. Ümid edirəm ki, nəticədən asılı olmayaraq Petev işinə davam edəcək. Çünki o Bolqarıstan millisinə yeni təyin olunub. Biz isə qələbə qazanmaq istəyirik.
- Rahid Əmirquliyevin xeyli zəifləmiş “Xəzər Lənkəran”da oynaması onun milli karyerasına necə təsir edəcək?
- Rahidlə bu barədə bir neçə dəfə söhbət etmişəm. Mən milli komandamın məşqçisiyəm. Mənim üçün Rahidin harda oynamasının fərqi yoxdur. Nə qədər ki, Azərbaycan millisinin baş məşqçisiyəm, Rahid yığmada oynayacaq.
Rüfət Nadirli, Sofiya