"Rəvan"ın baş məşqçisi Emin Quliyevin Sportarena.az saytına müsahibəsi
- "Rəvan" geridə qalan 7 turda qələbə qazana bilməyib. Sizcə, problem nədədir?
- Problem ondadır ki, komanda yox vəziyyətində idi, çox gec yığıldı. Komandanı yığanda əsasən klubsuz futbolçuları dəvət edib, onların arasında seçim elədik. Qalanlar bunlar oldu. Futbolçularımız azdır, çatmır. Hamısı cavanlardır. Təcrübələri azdır. Normal komanda yaratmaq üçün vaxt lazımdır.
- Əsasən hansı mövqelər sizi qane eləmir?
- Demək olar ki, hamısında çatışmazlıq var. Müdafiə, yarımmüdafiə və hücumda yaxşı futbolçulara ehtiyacımız var.
- Yəqin ki, qışda yeni oyunçular olacaq...
- Təbii ki. Mütləq olacaq. Çünki bu heyətlə mübarizə aparmaq çox çətindir.
- Məlum uğursuzluğa görə, rəhbərlik məşqçilər korpusuna hansısa irad bildirib? Yoxsa onlar da vəziyyətin nə yerdə olduğunu dərk edirlər...
- Xeyr, heç bir irad yoxdur. Hər oyunda öz səhvimizdən qol buraxırıq, uduzuruq. Yenə deyirəm, futbolçuların təcrübələri azdır. Səhvləri düzəltsək, hərşey qaydasına düşəcək.
- Son vaxtlar mətbuatda sizin istefaya göndəriləcəyiniz və yerinə Bəhmən Həsənovun gələcəyi ilə bağlı xəbərlər dolaşır...
- Xəbərim yoxdu, yerimə Bəhmən Həsənov gəlir, ya bəhmənkəs gəlir. Mənə deyirlər ki, başını sal aşağı, işini gör. Hazırda istefa söhbəti yoxdur.
Elnur SALAHOV