Ötən həftə səfərdə məğlub olmuş "Xəzər Lənkəran"ın U-17 komandası bu turda doğma meydanda “Kəpəz”i qəbul etdi. Sportarena.az xəbər verir ki, Ağadadaş Həmidovun yetirmələrin bütün oyun ərzində üstünlüyə malik olmaqla rəqibin qapısından iki cavabsız qol keçirə bildi. Hesabı Məhəmməd Şahbazzadə açdı, daha bir qol isə Kənan Həsənovun aktivindədir.
U-15 komandası isə qələbələr seriyasını davam etdirir. Bu dəfə paytaxtda “Təhsil” TFM ilə üz-üzə gələn 2001-ci il təvəllüdlü komanda daha bir böyükhesablı qələbəni rəsmiləşdirib – 6:0. Əliağa Məmmədov və Qədir Həsənovun dubl etdiyi matçda Murad Məmmədov və Tural Bayramov hərəyə bir dəfə fərqlənib.
Qeyd edək ki, artıq bu gün U-15 liqası çərçivəsində növbəti turun oyunları keçiriləcək. “Xəzər Lənkəran” evdə “Neftçi”ni qəbul edəcək.
Çərşənbə günü U-19 komandası uzaq Gəncə səfərindən bir xalla qayıtdı – 0:0.
Dünən isə U-16 komandası səfərdə “Bakı” ilə qarşılaşdı. Xəqani Sadıqov oyunda hesabı açsa da, meydan sahibləri hesabı bərbərləşdirə bildi və matç elə bu hesabla başa çatdı – 1:1.