“Qəbələ” Futbol Akademiyasının komandaları yeniyetmə futbolçular arasındakı liqalarda növbəti oyunlarını keçirib.
Sportarena.az klubun rəsmi saytına istinadən xəbər verir ki, komandalar ümumilikdə 7 matça çıxıb. Bunların yalnız birində heç-heçəylə kifayətlənən təmsilçilər 6 qələbə qazanıb. Ardıcıl 5-ci böyükhesablı qələbəsini qazanan U-17 səfərdə “Neftçi”ni 4:1 hesabı ilə məğlub edib. 5 oyundan sonra 15 xalla yarışın lideri olan “qırmızı-qaralar” VI turda “Bakı”nı qəbul edəcək.
U-16 ardıcıl qələbələrinin sayını 5-ə çatdırıb. Evdə “Bakı”nı 3 cavabsız qolla məğlub edən komanda 5 turdan sonra 15 xalla çempionatın lideridir. “Qəbələ” növbəti turda “Zirə”nin qonağı olacaq.
8 oyundan sonra 24 xalla turnir cədvəlinin 2-ci pilləsində yer alan U-15 Türkiyədə beynəlxalq turnirdə olduğundan “Xəzər Lənkəran”la ev oyunu təxirə salınıb.
Paytaxt regionunun Bakı zonasında çıxış edən U-14 “Xəzri” ilə qarşılaşmada 10:0 hesabı ilə qalib gəlib. “Qəbələ” 4 oyundan sonra 10 xalla 1-ci pillədə qərarlaşıb. Komanda növbəti turda AZAL-la görüşəcək. Eyni zonada çıxış edən U-13 AZAL-ın ardından “Sərhədçi”ni də eyni – 10:0 hesabı ilə məğlub edib. 4 oyunda 10 xal yığan komanda 2-ci pillədə qərarlaşıb. V turda “Qəbələ” “İnter”lə qarşılaşacaq.
U-12, U-11 və U-10 komandalarının çıxış etdiyi Şimal-Qərb və Qarabağ regionunun Qəbələ zonasında IV turun oyunları keçirilib. U-12 “Daşqın”la oyunda ilk xal itkisi ilə üzləşib – 2:2. Buna baxmayaraq, 4 oyundan sonra 10 xala malik “Qəbələ” 1-ci pillədəki mövqeyini qoruyub. “Qırmızı-qaralar” növbəti turda istirahət edəcək.
U-11 Liqasında 3-cü qələbəsini qazanan “Qəbələ” “Kürmük”ü 15:0 hesabı ilə məğlub edib. Hesabında 9 xal olan komanda 2-ci pillədə qərarlaşıb. Növbəti turda “qırmızı-qaralar” Qəbələnin digər təmsilçisi UGİM-lə üz-üzə gələcək. Klubun U-10 komandası “Daşqın”a 2:1 hesabı ilə qalib gəlib. Hesabında 12 xal olan “qırmızı-qaralar” yarışın lideridir. V turda komanda Mingəçevir UGİM-i ilə qarşılaşacaq. U-19 Qızlar Liqasında debüt mövsümünü keçirən “Qəbələ” 3-cü oyununu “Təhsil” FM-ə qarşı keçirib. 0:2 hesabı ilə uduzan “qırmızı-qaralar” 3 xalla 4-cü pillədə qərarlaşıb.