Premyer Liqada yaranmış fasilədən istifadə edərək yoxlama matçı keçirən "Qarabağ" "Rəvan"ı 1:0 hesabı ilə məğlub edib.
Sportarena.az xəbər verir ki, oyundan sonra "Qarabağ"ın baş məşqçisi Qurban Qurbanov Sportal.az-ın suallarını cavablandırıb:
- Oyun haqda fikirləriniz…
- Düşündüyümüz kimi maraqlı və gərgin oyun keçdi. Oyunçularımda yorğunluq var. Bir çox oyunçulara şans verdik. Bu matçda Armenteros 30 dəqiqə oynadı.
- Armenteros matçın 30-cu dəqiqəsində əvəzləndi. Bunu əvvəlcədən proqnozlaşdırmışdınız?
- Xeyr, Armenterosun ayağında yüngül ağrı oldu. 10-cu dəqiqədə epizodların birində rəqib futbolçu ilə mübarizədə baş verdi.
- Premyer Liqada “Qəbələ” ilə 7 xallıq fərq var. Sizcə, bu səbəb komandada futbolçuları arxayınlaşdırmayacaq?
- Qətiyyən xeyr. Əgər “Qəbələ” xallar itiribsə, deməli biz də itirə bilərik. Növbəti tur bizi “Kəpəz”lə çətin oyun gözləyir. Rəşad Sadıqov zədəli olduğu üçün “Tottenhem”ə qarşı oynaya bilməyəcək. Elvin Yunuszadənin Rəşad Sadıqovu əvəz edəcəyindən ehtiyatda müdafiəçi olmayacaq.
- Sizcə kapitanın olmaması komandaya necə təsir edəcək?
- Rəşad Sadıqov haqda tam dəqiq nəsə demək olmaz. Hər şey yaxşıya doğru gedir. Mən ümid edirəm ki, “Tottenhem”lə matçda Rəşad Sadıqovun xidmətlərindən yararlana biləcəyik. Hələ ki, müalicə gedir.
- “Tottenhem”lə matç “Qarabağ” üçün ölüm-dirim oyunudur…
- Bu oyuna ölüm-dirim deməzdim. “Tottenhem”in gücü və adı-sanı hər kəsə məlumdur. Məncə, azarkeşlər üçün də maraqlı olar ki, “Tottenhem” kimi komandanı canlı olaraq izləyə bilsinlər. Rəqib komanda olsa da, onların da bacarıqlı və istedadlı futbolçuları var. Azarkeşlər bir anlıq İngiltərə Premyer Liqasına gedib çıxa bilərlər (gülür). Biz çalışacağıq ki, rəqibə qarşı düzgün taktika ilə oynayaq və sona qədər mübarizə aparaq. İnşallah, əlimizdən gələni etməliyik ki, biz bu oyunda nəticə qazanaq. Düüşünürəm ki, azarkeşlər hər zaman olduğu kimi, bu dəfə də bizi tək qoymayacaqlar.
- Mahir Mədətov millinin heyətindən intizamsızlığına görə qovulub. Bu haqda Nazim Süleymanovla və Mahir Mədətovla söhbət etmisiz?
- Xeyr, hələ ki, söhbət etməmişəm. Mən hər zaman futbolçularıma tapşırıram ki, milli komandaya gedəndə, özünüzü yaxşı tərəfdən göstərin. Necə deyim, mən həmin epizodu canlı görməmişəm. Əgər yazılanlar və deyilənlər doğrudursa, futbolçunun belə hərəkət etməyi doğru deyil. Mahir Mədətovla söhbət etməmişəm. Lakin bu mövzu ilə bağlı onunla ciddi şəkildə söhbət edəcəm. Açığı, bu xəbəri eşidəndə təəccübləndim. Mahirdən elə hərəkəti gözləmirdim. Heç bir futbolçuya güzəşt edilməyəcək. Hətta komandanın ən güclüsü olsa belə intizam birinci növbədədi . Futbolçu məşqçinin tapşırığını yerinə yetirməlidi.
- Elvin Yunuszadə, Coşqun Diniyev və İlqar Qurbanov milliyə dəvət almadı. Sizcə Prosineçki seçimində ədalətsiz davranmayıb?
- Fikrimcə, xeyr. Əgər onların oyunu Prosineçkini tam şəkildə qane etsəydi, milliyə çağırardı. Düzdür, onlar son oyunlarda start heyətdə meydanda olurlar. Amma bu, o demək deyil ki, onlar milliyə dəvət almalıdırlar. Mən belə düşünürəm ki, son zamanlar milliyə haqqı olan futbolçular dəvət edilir.