"Oyun gərgin keçdi. İlk hissədə yaxşı oynasaq da, ikinci hissədə fərdi səhvlərdən qollar buraxdıq. İlk qoldan sonra açıq futbol sərgiləməyə başladıq və rəqib bundan istifadə etdi".
Sportarena.az xəbər verir ki, bu fikirlər "Xəzər Lənkəran"ın baş məşqçisi Yunis Hüseynova aiddir. Təcrübəli mütəxəssis Premyer Liqanın XIII turunda evdə "Neftçi"yə 0:2 hesabı ilə uduzduqları oyun haqda fikirlərini açıqlayıb:
"Deməzdim ki, komandam aqressiv idi, əksinə rəqib daha aqressiv davrandı. Bizim komandamızda intizamsızlıq ola bilməz. Oyunun gedişində “Neftçi”nin bizdən güclü təsir bağışlaması hiss olunmurdu. Heyətdə problemlərimiz var. Rasim Ramaldanov, Kamran Abdullazadə iynə hesabına oyuna çıxmışdılar. Düşünürəm ki, bütün bunlara baxmayaraq, rəqibə heç bir cəbhədə uduzmadıq. Məğlubiyyətə görə azarkeşlərimizdən üzr istəyirəm. Məğlub olmağımızı istəməzdim. Futbolçular da bunu başa düşməlidirlər".