Çexiyada qarışıq döyüş növləri (MMA) üzrə keçirilən dünya çempionatına yekun vurulub.
Sportarena.az Azərtac-a istinadən xəbər verir ki, 40 ölkədən idmançıların iştirak etdiyi mötəbər yarışda Azərbaycan baş məşqçi Etiqad Atakişiyevin rəhbərliyi altında 5 döyüşçü ilə təmsil olunub.
Azərbaycan millisinin heyətində Zaur Hacıbabayev qızıl medala sahib olub. Bütün rəqiblərinə qalib gələn Z.Hacıbabayev 100 kiloqramdan yuxarı çəki dərəcəsində karyerasında ikinci dəfə planetin ən güclüsü seçilib. İdmançımız finalda Qazaxıstan təmsilçisi Məhəmməd Süleymanov üzərində nokautla qələbə qazanıb.
Emin Hüseynov (61 kq) və Taleh Nəcəfzadə (84 kq) isə bürünc medala sahib olublar.
Komanda hesabında Azərbaycan Rusiya və Qazaxıstandan sonra üçüncü yeri tutub.