"CBC Sport" telekanalının baş direktor vəzifəsində dəyişiklik edilib.
Sportarena.az xəbər verir ki, bu barədə telekanalın rəsmi "facebook" səhifəsi bəyanat yayıb.
Bəyanatda deyilir: "CBC Sport" telekanalının baş direktoru İlham Rüstəmovla müqavilə müddəti 6 ay olub və həmin dövr artıq başa çatıb. Bu müddətdə İlham Rüstəmov kanalın infrastrukturunun qurulmasında, efirə çıxmasında, Azərbaycan teleməkanında ilk HD formatda yayımın gerçəkləşməsində, bir çox veriliş və xüsusi buraxılışların hazırlanmasında böyük rol oynayıb.
Hazırda "CBC Sport" futbol üzrə Azərbaycan Premyer Liqasının, 1-ci divizionun, ölkə kubokunun və U-19 qızlar liqasının oyunlarını yayımlayır. Bu qısa müddətdə kanalımızda futbol üzrə milli komandanın Moldova ilə 2015-ci ilin sonuncu oyunu, habelə U-21 gənclərdən ibarət yığmanın "Avrp-2017" çərçivəsində seçmə mərhələ görüşləri, futzal üzrə Avropa çempionatının seçmə mərhələsinin pley-off və dünya çempionatının qrup seçmə matçları, dünya futboluna gəlincə, İtaliya, Hollandiya, Rusiya futbol çempionatları, Türkiyə kuboku qarşılaşmaları, FİFA klublararası dünya çempionatının matçları təqdim olunub.
Milli Basketbol Assosiasiyası NBA müntəzəm çempionatı, həmçinin tennis üzrə ATP və WTA seriyalı turnirlər "CBC Sport"un efirində yer alıb. Tamaşaçılar peşəkar boksda Vladimir Kliçko ilə Tayson Fyuri arasında ağır çəkidə super döyüşü də Azərbaycanda CBC Sport vasitəsilə izləyiblər. Karate və cüdo üzrə böyüklər və gənclər arasında Azərbaycan çempionatları yüksək, indiyədək görünməmiş keyfiyyətdə yerli idmansevərlərə təqdim edilib.
Hazırda AFFA və PFL-in birgə təşkilatçılığı ilə 5 klubun iştirakıyla keçirilən “CBC Sport Kuboku” turnirinin oyunları da ictimaiyyətə bizim kanalla çatdırılır. “CBC Sport Info” xəbərlər buraxılışı gündə 3 dəfə efirdə olur. Ölkənin və dünyanın idman həyatında baş verən ən son məlumatlar yüksək peşəkarlıqla və dolğun şəkildə tamaşaçılara çatdırılır.
"CBC Sport" telekanalı İlham Rüstəmova gördüyü işlərə görə təşəkkür edir, ona gələcək fəaliyyətində uğurlar arzulayır!
"CBC Sport" telekanalının baş direktor vəzifəsini, funksiyaları və xidmətlərini müvəqqəti olaraq Volkan Üst icra edəcək. 20 ildən çox iş təcrübəsinə malik olan bu mütəxəssis Türkiyə, Kanada və bir sıra digər ölkələrdə çalışıb. Türkiyə və İngiltərədə televiziya sahəsində təhsil alan Volkan Üst xeyli məşhur telelayihələrin hazırlanmasında iştirak edib".