Azərbaycanın hazırda ən perspektivli futbolçularından biri Elnur Cəfərov "Qarabağ"a transfer olmağa çox yaxın idi. Amma bu transfer baş tutmadı. Maraqlıdır ki, imtinanın səbəbkarı "Xəzər Lənkəran" yox, məhz futbolçu özü olub.
Sportarena.az xəbər verir ki, "Qarabağ"ın son illərdəki daxili və xarici arenadakı uğurları demək olar ki, bu komandanı bütün futbolçular üçün arzuolunan məkana çevirib. Son zamanlar, xüsusən də, “Xəzər Lənkəran” maddi çətinlik yaşadığı bir vaxtda milli komandalarımızın, eləcə də “ağ-yaşılların” əsas üzvü 19 yaşlı Elnur Cəfərov “Qarabağ”a keçməyə çox yaxın idi. Yanvarın 29-da açıqlamasında Cəfərov ilk növbədə xaricə getməyi düşündüyünü, alınmayacağı halda isə “Qarabağ”ı seçəcəyini demişdi.
Maraqlıdı ki, “Xəzər Lənkəran” və “Qarabağ” bu keçidi razılaşdırdığı halda futbolçu son çempiondan imtina edib.
Elnur Cəfərov isə bu imtinaya aydınlıq gətirib. Ailəsi ilə məsləhətləşən futbolçu böyük ehtimalla qarşıdakı həftə ərzində əcnəbi klubla anlaşacağından Ağdam təmsilçisinə yox deyib.
Qeyd edək ki, Azərbaycanda transfer pənəcərəsi fevralın 2-də bağlanıb.
(Xəzər Xəbər)