“Komandamız artıq öz oyununu tapıb. Futbolçularımızın oyun səviyyəsi hər tur, hər oyun getdikcə daha da yaxşılaşır. Buna görə futbolçularımıza təşəkkür edirəm. Belə davam etsək qarşımıza qoyduğumuz məqsədə nail ola biləcəyik”.
Sportarena.az xəbər verir ki, bu sözləri Azərbaycan Premyer Liqasının XXIII turunda “Neftçi”yə 3:0 hesabı ilə qalib gəlmiş “Zirə”nin baş məşqçisi Adil Şükürov deyib.
Baş məşqçi futbolçularının “Neftçi”dən daha dəqiq oynadığını bildirərək qələbə qazandığını bildirib:
“Biz oyundan öncə “Neftçi”yə neçə top vuracağımızı fikirləşmirdik. Sadəcə olaraq futbolçularımız məsuliyyətli və dəqiq oyun nümayiş etdirərək qələbə qazandı. Bu futboldur. İstənilən nəticə alına bilər. “Neftçi”nin durumunu bilirdik ona görə planımızı qurduq, oynadıq və qələbə qazandıq".