“İlk hissədə o qədər də yaxşı oyun nümayiş etdirə bilmədik. Amma ikinci hissədə komandam özünə gəldi. Bir neçə qol imkanımız oldu amma yararlana bilmədik. Bəzi səhvlərimiz oldu. Bu səhvlərin nəticəsində də qol buraxdıq. Çalışacağıq növbəti oyunlarda belə səhvlər etməyək”.
Sportarena.az xəbər verir ki, bu sözləri Premyer Liqamızın XXIV turunda AZAL-a 0:1 hesabı ilə məğlub olan “Xəzər Lənkəran” klubunun baş məşqçisi Elbrus Məmmədov deyib.
Baş məşqçi komandanın qolkiperi Orxan Sadıqlının əsas heyətdə yer almamasına da fikir bildirib:
“Orxan Sadıqlının dizində problem olduğu üçün bu gün meydana Tərlan Qasımzadəni çıxardıq. Bizim hal-hazırda əsas məqsədimiz kubokda uğurlu çıxış etməkdir. Bu səbəbdən komandanın heyətini kubok oyunda “Neftçi”yə qarşı keçirəcəyimiz matça qədər qorumaqdır”.