Futbolçuların viza məsələlərində heç bir problemi olmayacaq.
Sportarena.az xəbər verir ki, bunu jurnalistlərə müsahibəsində AFFA İcraiyyə Komitəsinə yeni üzv seçilən xarici işlər naziri Elmar Məmmədyarov deyib.
“Azərbaycan futbolunda inkişaf gedir, son zamanlar “Qarabağ” və “Qəbələ” Avropa Liqasının qrup mərhələsinə vəsiqə qazandı. Hazırda “Zirə” də yaxşı oyun göstərir, ancaq Avropa turnirlərində iştirak etmək üçün təcrübə çox önəmlidir. Bu yay görəcəyik ki, Azərbaycan klubları Çempionlar Liqasında necə iştirak edir”, - E.Məmmədyarov deyib.
O hələ ki, planlardan danışmağın tez olduğunu vurğulayıb və ümumilikdə futbolun nüfuzunu artırmağı təklif edib: “Özüm də Azərbaycan futbolunun azarkeşiyəm və futbolla maraqlanıram. Hər dəfə həm yığma komandanın, həm də klubların oyunlarına getməyə çalışıram. Azərbaycan klublarından “Qarabağ” xoşuma gəlir, “Neftçi” də yaxşı oyun göstərir”.