Norveçin Fyorde şəhərində keçirilən ağır atletika üzrə Avropa çempionatı davam edir.
Sportarena.az xəbər verir ki, Rioya lisenziya xarakterli yarışın 4-cü günündə Azərbaycan millisinin daha bir idmançısı körpücük üzərinə çıxıb.
63 kq çəki dərəcəsində gücünü yoxlayan Elnarə Abbasova uğursuzluqla üzləşib. Belə ki, birdən qaldırma hərəkətində 79 kq, təkanla qaldırma 102 kq-lıq çəkini ram edən atletimiz yekunda 15-ci yerdə qərarlaşıb. O, çempion olan rusiyalı Natalya Xlestkinadan (99 kq + 123 kq) 41 kq geri qalıb.
Qeyd edək ki, Avropa çempionatında hələlik bir qızıl medalımız var. Yarış isə aprelin 17-də başa çatacaq.