"Avro-2016" UEFA bayrağı altında keçirilən ən çox gəlir gətirən yarış olacaq. Avropa futbol qurumunun gəlirinin 2 milyard avro olacağı gözlənilir.
UEFA 4 il öncə təşkil olunan Avropa çempionatı zamanı 1,4 milyard qazanmışdı. Gəlirin artmasının əsas səbəbi komandaların sayının 16-dan 24-ə yüksəlməsidir. Televiziya yayımından gələn məbləğ 1,05 milyard olacaq ki, bu da ötən turnirlə müqayisədə 25 faiz çoxdur. Sponsor ödənişləri də 40 faiz artaraq, 450 milyon avro təşkil edir. Digər gəlirlər isə bilet satışından əldə olunacaq.
Qeyd edək ki, "Kopa America"nın yayım hüququ cəmi 112 milyon dollara satılıb. "Avro-2016"nın final matçını televiziya vasitəsi ilə 300 milyon adamın izləməsi gözlənilir.