Bu gün Avropa Liqasının qrup mərəhələsi çərçivəsində “Qəbələ” Almaniyanın “Maynts” klubunu qəbul edib (2:3).
Sportarena.az-ın stadionda olan əməkdaşının verdiyi məlumata görə, matçdan sonra “Qəbələ” klubunun vitse-prezidenti Fariz Nəcəfov jurnalistlərin suallarını cavablandırıb.
“Oyundan öncə də futbolçularla söhbətimiz zamanı onlara demişdik ki, qrupdan çıxmaq üçün əlimizdə olan şansı dəyərləndirməliyik və bu oyunda mütləq qələbə qazanmalıyıq. Amma təəssüflər olsun ki, qələbəni qazana bilmədik. Hamınız gördünüz ki, oyun maraqlı keçdi. Bir çox epizodlarımız oldu, lakin istifadə edə bilmədik”.
- Müdafiədə çoxlu səhvlər olurdu. Ümumiyyətlə, komandanın oyunundan razı qaldınızmı?
- Hər komandada oyun zamanı səhvlər olur. Komandanın bugünkü oyunundan çox razı qalmışam.
- Artıq “Qəbələ” qrupda ikinci məğlubiyyətini aldı. Bunu komandanın qrupdan çıxması üçün qırılma nöqtəsi hesab etmək olar?
- Məncə, hələ şans var.
- Bu məğlubiyyət komandanın ölkə çempionatındakı oyunlarına necə təsir edə bilər? Ötən il də komanda Avroliqadakı məğlubiyyətlərdən sonra çempionatda zəif çıxış etməyə başladı.
- Keçən ilki “Qəbələ” ilə bu ilki “Qəbələ” arasında çox fərq var. Bizim artıq əvvəlkinə nisbətən daha çox təcrübəmiz var. Əvvəl haradasəhvlər etmişdiksə, bu il həmin səhvləri etməməyə çalışacağıq. Bunlar fərqli turnirlərdi. Buna görə də növbəti oyunlara daha yaxşı hazırlaşacağıq.
- Nika Kvekveskirinin yoxluğu hiss olunurdumu?
- Keçən oyunda da hiss etmişdik. Oyunçuların sayı məhduddu və meydanda olmayan hər bir futbolçunun yeri hiss olunur.
- Demək olarmı ki, "Qəbələ” bu gün oyunçu azlığına görə məğlub oldu?
- Bəli. Demək olar ki, əsas səbəblərdən biri də budur.
- Almaniya və Azərbaycan çempionatlarında fərq çoxdur. Lakin “Qəbələ” buraya qədər gəlib çıxıb. Qrupdan çıxmaq üçün sizin fikrinizcə nə lazımdır?
- Açıq danışırıqsa, səviyyə fərqi çox böyükdü. Hər şey gəlib büdcəyə bağlanır. Biz çalışırıq ki, ölkəmizi və şəhərimizi layiqli şəkildə təmsil edək. Əlimizdən nə gəlirsə etməyə çalışırıq.
- Taleh Heydərov bəs büdcə barədə nə düşünür?
- Büdcəni açıqlamaq istəmirəm. “Maynts”ın büdcəsi bizimkindən 8 dəfə çoxdur. 1-2 transferlə güclənmərik. Səviyyə fərqi çoxdur.
- Roman Qriqorçukun adı başqa klubla hallananda "Qəbələ" eniş yaşayır...
- Siz eniş nəyə deyirsiz? Biz eniş yaşamırıq axı. Güclü rəqiblərə uduzmuşuq. Qəbul etmək lazımdır ki, rəqib çox güclüdür. Desəm ki, məşqçi taktiki səhv etdi, yalan deyərəm. Amma bu futbolçularla maksimum budur.
- Bu il “Qəbələ” Premyer Liqada çempion ola bilər?
- Onu zaman göstərəcək. Bütün turnirlərə ciddi hazırlaşırıq. Əvvəlcədən proqnoz verməyi sevmirəm. Əlimizdən gələni edirik.
- Premyer Liqada qol buraxmayan Bezotosnı Avropa Liqasında 2 oyuna 8 qol buraxıb...
- Fərqli turnirlərdir. Müqayisə etmək düzgün deyil. Hər gün bunu danışırıq. Çempionatımızı inkişaf etdirməliyik.