"Çexiya barədə çox danışmağa ehtiyac yoxdur. Bu komandanı hamı tanıyır. Bizi ağır oyun gözləyir. Əlimizdən gələni edəcəyik ki, istədiyimiz nəticəni əldə edək".
Sportarena.az xəbər verir ki, bu sözləri millimizin futbolçusu Rahid Əmirquliyev DÇ-2018-in seçmə mərhələsində Çexiya ilə oyun öncəsi keçirilən mətbuat konfransında deyib.
Daha sonra o, jurnalistlərin suallarını cavablandırıb.
- Rəqib baş məşqçi oyunöncəsi mətbuat konfransında Prosineçkini təkcə futbolçu kimi tanıdığını dedi. Oyununuzla Prosineçkini ona məşqçi kimi də tanıtmağa hazırsınız?
- İnanmıram ki, Prosineçkini məşqçi kimi tanımasın. Bu, gülməli gəlir. Sabah meydanda oyunumuzla özümüzü sübut edəcəyik.
- Sabahkı oyunda qələbə qazansaz, qrupdakı yerinizi təmin etmiş sayacaqsız?
- İlk iki oyundan 6 xal qazanmışıq. Bura da yaxşı nəticə əldə etmək üçün gəlmişik. Çalışacağıq, yaxşı nəticə əldə edib, qrupdakı mövqeyimizi saxlayaq.