Təcrübəli mütəxəssis Yunis Heseynov apasport.az saytına müsahibə verib.
Sportarena.az həmin müsahibəni təqdim edir:
- “Qəbələ” və “Qarabağ” sabah Avropa Liqasının qrup mərhələsi çərçivəsində növbəti oyunlarına çıxacaqlar. İlk olaraq, səfərdə “Sent-Etyen”lə qarşılaşacaq “Qəbələ”nin şansını necə dəyərləndirərdiz?
- “Sent-Etyen”lə əvvəlki illərdə “Qarabağ” qarşılaşıb. Onların oyunlarına bələdik. Mənə elə gəlir ki, xal götürmək mümkündü. “Qəbələ” “Maynts”la Bakıdakı görüşdə də özünü yaxşı tərəfdən göstərmişdi. Mübarizə aparan, döyüşkən komandadı. Açığı, “Sent-Etyen”in hazırkı durumu ilə bağlı məlumatım yoxdu, oyunlarını izləməmişəm. Təbii ki, çox çətin olacaq.
- “Qəbələ”nin heyətlə bağlı da ciddi problemləri var. Baqali Dabo, Rəşad Sadiqov və Nika Kvekveskiri zədə səbəbindən sabahkı oyunu buraxacaqlar. Sizcə, hazırkı vəziyyətdə “Sent-Etyen”dən xal almaq nə dərəcədə inandırıcıdı?
- Bu amil komandanın işini daha da çətinləşdirəcək. Çünki adlarını çəkdiyiniz futbolçuların kifayət qədər təcrübələri var. Məncə, onlar zədəli olmasaydı belə, “Qəbələ”nin işi ağır olacaqdı. Digər tərəfdən, bu komandanın ehtiyat qüvvəsi də geniş deyil. Oyunçu sayı baxımından problemləri var. “Qəbələ”nin Fransadan xalla dönməsini hamı kimi, mən də arzulayıram. Ancaq açıq demək lazımdı, buna inamım azdı. Yalnız “döyüşərək” xal almaq olar.
- “Qarabağ” isə PAOK-u qəbul edəcək. Ölkə çempionunun qələbə şansını necə görürsüz?
- “Qarabağ” ötən turda “Fiorentina”ya böyük hesabla məğlub olandan sonra çoxları deyirdi ki, komanda özünə gəlməkdə çətinlik çəkəcək. Mən isə belə düşünmürəm. PAOK da bizə tanış komandadı. “Qəbələ” ötən mövsüm qrup mərhələsində onlara qarşı çıxış etmişdi. Ordan-burdan oxuduğum xəbərlərə görə, PAOK indi daha güclüdü, yaxşı transferlər edib. Buna baxmayaraq, inanıram ki, “Qarabağ” “Fiorentina”ya məğlubiyyəti qələbə ilə unutduracaq.
- PAOK-la qarşıdakı iki oyunun nəticəsi “Qarabağ”ın qrupdakı taleyinə aydınlıq gətirə bilərmi?
- Mənə elə gəlir ki, əsas rəqib məhz PAOK-du. Bu səbəbdən qarşıdakı oyunlar çox önəmlidi. Məhz bu iki matç “Qarabağ”ın taleyinə aydınlıq gətirə bilər. “Qarabağ” PAOK-dan 4 xal ala bilsə, qrupdan çıxacaq. Təmsilçimizin “Slovan”la da oyunu olacaq. “Qarabağ” onları Çexiyada məğlub edə bilər.
- Kapitan Rəşad Sadıqovun iştirakı sual altındadı. Onun yoxluğu müdafiədən hücum qurmaq baxımından ciddi problemə çevrilməz?
- Yəqin ki, Qurban Qurbanov bunu nəzərə alacaq. Rəşad oynasa, daha yaxşı olar. Amma olmasa da, onu əvəz edən futbolçunun bunu hiss etdirməməyə çalışacağına əminəm.
- PAOK-un sahibi İvan Savvidis komandanın qarşısına “Qarabağ”dan 6 xal almağı məqsəd qoyub...
- Elə bu sözlərinə görə “Qarabağ” onları cəzalandıracaq. Həmişə belə olur, rəhbərlər komandadan maksimum nəticə istəyirlər. Bəzən də bu, onlara baha başa gəlir. Çexiya yığmasının baş məşqçisi də millimizlə oyunöncəsi çox iddialı danışmışdı. Amma komandamız onlardan xal aldı. PAOK-un sahibi də 6 xal istəyirsə... Sabah onları Bakıdan xalsız yola salarıq.
- Necə düşünürsüz, bu mövsüm növbəti mərhələdə Azərbaycan klubunu görə biləcəyikmi?
- Yəqin ki, “Qarabağ”ı görə bilərik. “Qəbələ” üçün çətin olar.
- Bir qədər də çempionatımız barədə. Razısız ki, son illərin ən zəif mövsümünü izləyirik?
- Bizdə çempionat var ki? 8 komandalı çempionatdan nə danışaq? Bu nə çempionatdı? Mətbuatı izləyirəm, bəziləri deyir ki, çempionatımız yüksək səviyyədə keçir, gərginlik çoxdu. Amma mən bunları görmürəm. 8 komandalı çempionatda nə səviyyə artacaq, nə də gərgin mübarizə olacaq. Demək olar ki, bütün oyunlar Bakıda keçirilir. Elə bil Bakı çempionatıdı. “Kəpəz” – “Qarabağ” oyununda azarkeş çox idi. “Kəpəz” də Gəncədə azarkeşlərinin dəstəyi sayəsində mübarizə aparıb, rəqibindən xal aldı. Rayonlarda futbol olsa, o zaman inkişafdan danışmaq olar. Bakıda hansı oyuna azarkeş gedir? Futbola azarkeşlər gözəllik qatır. Azarkeş də rayonlarda olacaq, Bakıda yox. Bakıdakı oyunlar zamanı diqqət yetirin, futbolçularda motivasiya yüksək səviyyədə olmur. Digər tərəfdən, təzyiq hiss etmədikləri üçün rahat olurlar. Bir sözlə, çox zəif çempionat keçir.
- İctimaiyyət “Qarabağ”ın ötən mövsümlə müqayisədə zəiflədiyini düşünür. Bu, məhz çempionatdakı rəqabətsizlikdən qaynaqlanmır?
- Əlbəttə, bunun böyük təsiri var. Bir az “Qarabağ”, “Qəbələ” və “İnter” seçilir. Avrokubokda iştirak etdiyi üçün “Qarabağ”la “Qəbələ” digərlərindən fərqlənir. Amma istər-istəməz onların da səviyyəsi aşağı düşür. Nəticədə 8 komandanın səviyyəsi bir-birinə yaxın olur. Çünki futbolçular çox “artıra” bilmirlər, rəqabət görmürlər.