"Ağır oyun oldu. "Ağsu" həmişə yüksək yerlər uğrunda mübarizə aparıb. Biz də eynilə, zirvəyə oynayırıq. Bu oyunda mütləq qalib gəlməliydik. Bütün fikrimizi qələbəyə kökləmişdik. Şükür Allaha qalib gəldik."
Bu sözləri Azərbaycan birinci divizionunun XII turunda “Ağsu”ya 3:1 hesabı ilə qalib gələn “Zaqatala”nın futbolçusu Arzuman Nəsibov sportarena.az saytına açıqlamasında deyib.
Futbolçu Premyer Liqaya yüksəlmək üçün əllərindən gələni əsirgəməyəcəklərini deyib:
“Komandada ab-hava əladır. Çempionluğa oynayırıq. Premyerliqada çıxış etmək istəyirik. Bunun üçün əlimizdən gələni edəcəyik. Öz üzərimdə də çox çalışıram ki, komandam Premyer Liqaya yüksəldiyində mən də komandaya daha çox kömək edim. “Simurq”un vaxtında orada da oynayırdım. İndi də çalışıram ki, daha artığını edim komandam üçün. ”
Oyunda komandasının 3-cü qolunu vuran futbolçu matçın 64-cü dəqiqəsində qırmızı vərəqə alaraq, meydandan kənarlaşdırılıb. Hakimin şübhəli qərarına hörmətlə yanaşan futbolçu əməkdaşımızla söhbətində bunları dedi:
“Qapıçının və mənim fikrimcə həmin epizod penalti idi. Hətta qapıçı mənə də dedi ki, orada penalti var idi. Ancaq hakimin qərarına hörmətlə yanaşıram. Nə etmək olar? Artıq gecdir. Növbəti oyunları fikirləşəcəyik. “Zaqatala”ya çempionluq yaşatmalıyıq."
İlkin İsmayılzadə, Zaqatala