“Çempion titulunu qoruyan idmançı kimi, Budapeştdəki çıxışımı təkrarlamaq və ardıcıl ikinci titulumu qazanmaq istəyirəm”.
Sportarena.az xəbər verir ki, bunu Beynəlxalq Cüdo Federasiyasının (IJF) rəsmi saytına müsahibəsində Yaponiya yığmasının üzvü Soiçi Haşimoto sentyabrın 20-də Bakıda start götürəcək dünya çempionatındakı hədəfi barədə danışarkən deyib.
Ötən il Macarıstanın paytaxtı Budapeştdə keçirilmiş dünya çempionatında qızıl medal qazanan 27 yaşlı cüdoçu bildirib ki, bu cür rəqabət səviyyəsində heç bir təzyiq hiss etməmək çətindir. 73 kq çəki dərəcəsindəki son dünya çempionu hər bir turnirdən həzz almağa çalışdığını söyləyib:
“Mənim çoxlu rəqibim var. Amma onların hər birinə qarşı fərdi şəkildə hazırlaşmaq üçün heç nə etmirəm. Ən böyük hazırlığım “Mən çempion olacağam” düşüncəsidir. Favorit sayıldığım üçün bu cür rəqabət səviyyəsində heç bir təzyiq hiss etməmək çətindir. Ona görə də təzyiqi qəbul edir və sadəcə, turnirdən həzz almağa çalışıram. Cüdo aləmində çoxlu dostum var. Onlarla birgə işləmək və məqsədləri bölüşmək baxımından bəxtim gətirib. Cüdoya köklənə biləcəyim bir ortamda olduğum üçün hər kəsə - valideynlərimə, dostlarıma, azarkeşlərə, məni dəstəkləyən insanlara minnətdaram”.
Qeyd edək ki, Soiçi Haşimoto 2017-ci ilin dünya, 2016-cı ilin Asiya çempionu, 2015-ci il Asiya çempionatının bürünc mükafatçısı, "Böyük Dəbilqə" seriyalı turnirlərdə 6 qızıl, 1 gümüş, 1 bürünc medalın sahibidir. O, ötənilki dünya çempionatının finalında Azərbaycan təmsilçisi Rüstəm Orucovu üstələyib.