Azərbaycan kubokunun yarımfinal mərhələsinin “Sumqayıt”la oyunu “Zirə”nin tarixində ən məhsuldar heç-heçə olub.
Sportarena.az xəbər verir ki, “qartallar” ilk dəfə üç qol vurduğu matçda eyni sayda top buraxıb. Bu qarşılaşmayadək müxtəlif turnirlərdə 43 heç-heçə edən komandamızın sülhlə bitən görüşlərində belə məhsuldarlıq qeydə alınmamışdı.
Bu görüş “Zirə”nin kubokda keçirdiyi ev oyunlarında ilk heç-heçədir. “Sumqayıt”la duelədək öz meydanında keçirdiyi 5 matçda 3 qələbə qazanıb 2 dəfə məğlub olan komandamız heç-heçə etməmişdi. “Qartallar” ilk dəfə üç qol buraxdığı görüşdə məğlubiyyətdən qaçıb. Eyni zamanda komandamız ilk dəfədir ki, üç qol vursa da qələbə qazanmayıb.
Qeyd edək ki, Azərbaycan kubokunda ilk dəfə “Zirə”nin oyununda səfər qolu qaydası həlledici olub. Rəqib meydanında qolsuz heç-heçə edən “qartallar” evdə 3:3 hesablı sülhə imza atdığından mübarizəni dayandırıb.