3 qat dünya və 3 qat Avropa çempionu Hacı Əliyev İctimai Televiziyada efirə gedən "Bol İdman" verilişində Kənan Hakimovun qonağı olub.
Sportarena.az xəbər verir ki, 28 yaşlı idmançı Qazaxıstanın paytaxtı Nur-Sultandakı dünya çempionatında rusiyalı Hacımurad Rəşidovla təsnifat mərhələsinin görüşü zamanı baş verən qalmaqalı şərh edərkən haqsızlığa uğradığını bildirib. Hacı məşqçiləri - Arif Abdullayev və Zəlimxan Hüseynova da öz iradını çatdırıb:
“İdmanda qalib gəlmək də olur, uduzmaq da. Biz haqsızlığa tez-tez uğrayırıq. Hakimlər bəzən 50/50-yə düşündükdə haqsızlıq edirlər. Amma bu dəfəki hadisə tamam başqa idi. Başıma ilk dəfə belə hadisə gəldi. Hakimlərin etdiyi böyük səhvdir. Dünya çempionatına belə zəif hakimləri buraxmaq beynəlxalq federasiyanı düşündürməlidir. Çünki bu, azarkeşlərdə marağı azaldır. Özüm də həmin görüşdən sonra düşündüm ki, lazımsız hərəkətlər etmişəm. Özümə yaraşdırmadım bu hərəkətləri. Həmin vaxt özümdən çox çıxmışdım.
Əgər epizodlara baxsanız, görərsiniz ki, hakimin yanında oturub qərarı gözləyirəm. Həmin vaxt hakim mənə dedi ki, “rahat ol, 2 xal sənindir”. Mən də buna çox sevindim. 1 xalı gördükdən sonra öz məşqçilərimizə dedim ki, siz də etiraz edin. Orda bir dəfə qərar veriləndən sonra, ikinci etiraz hesab olunmur. Qərardan sonra xalça üzərində tək qaldım. Məşqçilərimiz də mənə dəstək məqsədilə yanıma gəlməli idilər. Amma bunu etmədilər. Bu, bizim güləşimizə yaraşmır”.