AFFA-da 4 vitse-prezident olacaq

12:11 8 Yanvar 2020

AFFA-nın növbədənkənar iclasından sonra baş katib Elxan Məmmədov jurnalistlər üçün brifinq təşkil edib. 

 

Sportarena.az xəbər verir ki, federasiya rəsmisi əvvəlcə hesabat-seçki konfransının vaxtını açıqlayıb: “Bu konfrans yanvarın 28-də baş tutacaq. Orda baş məşqçi məsələsi də müzakirə ediləcək”. 

 

Məmmədov AFFA-da olan struktur dəyişikliyindən danışıb: “Bir neçə komitə ləğv edildi. Əvvəlki nizamnamədə çox sayda komitələr var idi. Hansı ki, onların fəaliyyəti görünmürdü. İcraiyyə Komitəsində üzv sayı 11-dən 13-ə qalxdı. Bu bütün dünyada olan tendensiyadır. Bunun səmərəsi olacaq. Vitse-prezidentlərin də sayı artdı. 4 vitse-prezident olacaq. İcraçı vitse-prezident də olacaq. Baş katib isə yerində qalacaq. İcraiyyə Komitəsinə namizədlər veriləcək. Daha sonra AFFA prezidenti vitse-prezidentləri təyin edəcək”. 

 

Baş katib İcraiyyə Komitəsindən hələlik heç kimin istefa vermədiyini bildirib: “İcraiyyə Komitəsindən hələlik heç kim istefa verməyib. Onsuz da 28 yanvarda müddət başa çatacaq”. 

 

“Bu dəyişikliklərin Elxan Məmmədovun səlahiyyətlərini artırmaq üçün edildiyi deyilir. Bu doğrudurmu” sualına baş katib belə cavab verib: “Bütün səlahiyyətlər konfranslarda və İcraiyyə Komitəsindədir”. 

 

Məmmədov futbolumuzun durumuna görə tənqid olunması barədə isə bunları deyib: “Tənqidə normal baxıram. Sağlam tənqidə hamı hazır olmalıdır. Bu təkcə məndən asılı deyil. Futbolun sistemi belədir. Nizamnamədə mənim tənqidim yox idi”. 

 

Federasiya rəsmisi Malta ilə mart ayının sonunda keçirəcəkləri matça qədər baş məşqçi məsələsinə böyük ehtimalla aydınlıq gələcəyini bildirib: “Malta ilə oyuna qədər  baş məşqçi məsələsinə aydınlıq gələcəyinə ümid edirəm. Bundan başqa biz Maltada daha bir yoldaşlıq görüşü keçirəcəyik. Latviya ilə Maltada qarşılaşacağıq. Bildiyiniz kimi mayda Türkiyə yığması ilə oynayacağıq. Bundan başqa AÇ-2020 üçün Bakıya erkən gələcək Uels yığması ilə də qarşılaşa bilərik”.


Xəbər xətti