Futbol üzrə Azərbaycan millisinin sabiq futbolçusu, Novorossiyskin “Çernomorets” klubunun oyunçusu (1992-2005) Lev Mayorov 51 yaşında dünyasını dəyişib.
Sportarena.az xəbər verir ki, bu barədə klubun rəsmi saytı məlumat yayıb. Bildirilir ki, Bakıya gəlməyə hazırlaşan Mayorovun qəfil ölümü sarsıdıcı olub. Futbolçunun ölüm səbəbi bilinmir. Klub Lev Mayorovun doğmalarına və yaxınlarına başsağlığı verib.
Qeyd edək ki, 1969-cu ildə Bakıda anadan olan Mayorov “Neftçi” komandasının yetirməsi olub. Futbolçu karyerası boyu həm müdafiəçi, həm də yarımmüdafiəçi kimi çıxış edən Mayorov daha çox Novorossiysk "Çernomorets"ində çıxışı ilə tanınıb. 1992-2005-ci illərdə bu komandanın şərəfini qoruyan Lev, ümumilikdə 417 görüşdə 37 qol vurub. Bunlar arasında 208 oyunda 13 qol Rusiya Premyer-Liqasına təsadüf edir.
