“Keşlə”nin qapıçısı Stanislav Namaşko Moldova Futbol Federasiyasının rəsmi saytına açıqlamalar verib.
Sportarena.az xəbər verir ki, hazırda Tiraspol şəhərində olan təcrübəli çərçivə qoruyucusu Azərbaycana qayıtmaq üçün çarter reysi gözlədiyini bildirib. Moldovalı qapıçı istənilən an Azərbaycana qayıtmağa və komandasına qoşulmağa hazır olduğunu bildirib: “Kişinyovda yerləşən Azərbaycan səfirliyi ilə əlaqə saxlamışam. Bütün lazımı sənədləri hazırlayıb Azərbaycan vətəndaşları üçün Bakıya çarter reysinin təşkil olunmasını gözləyirəm”.
Namaşko “Keşlə” ilə müqaviləsinin iyunun 31-dək olduğunu açıqlayıb: “Pandemiya səbəbindən hələlik rəhbərliklə müqavilənin uzadılması barədə danışmamışam. Açığı, “Keşlə”də oynamağa davam etmək istərdim. Buna görə də ümid edirəm ki, mənə yeni müqavilə təklif olunacaq”.
Qeyd edək ki, Stanislav Namaşko cari mövsümün əvvəlində “Keşlə”yə transfer olunub.