“Avrokubokların yarımfinalında oynamaq zamanıdır” - “Qarabağ”ın prezidenti

Sportarena.az      31 Oktyabr 2021 , 11:43

“Qarabağ”ın prezidenti Tahir Gözəl Azərbaycan Premyer Liqsının 9-cu turunda evdə “Neftçi”yə 4:0 hesabı ilə qalib gəldikləri matçdan sonra jurnalistlərin suallarını cavablandırıb.

 

Sportarena.az həmin müsahibəni təqdim edir:

 

- Komandanı təbrik edirəm. Çox gözəl oynadıq və layiqli qələbə qazandıq. “Neftçi” və “Qarabağ”ın oyunu fikrimcə, iki aslanın qarşılaşmasıdır. Bizim üçün çox ciddi rəqibdirlər. Bu səbəbdən qarşılaşmanı izləməyə gəldim. Ötən mövsüm “Neftçi” bizi 3 qarşılaşmada məğlub etmişdi. Ona görə də bu qələbədən həzz aldım. İlk hissədə 3 qol vurduq, düzdür, fasilədən sonra “Neftçi” fərqi azaltmaq istəsə də, “Qarabağ” buna imkan vermədi. Hər iki komandanı gözəl oyuna görə təbrik edirəm. “Qarabağ” üçün gözəl oyun oldu. Konfrans Liqasında “Kayrat”la oyundan öncə belə qələbə bizə lazım idi.

 

 - Bu qələbə çempionluq yolunda çox vacibdir, yoxsa hələ uzun yol var?

 - Çempionat çox uzundur. Futbolda erkən sevinmək olmaz. 1989-cu ildə keçirilən “Fənərbaxça” – “Qalatasaray” oyununu yaxşı xatırlayıram. İlk hissədə “Fənərbaxça” 0:3 hesabı ilə uduzurdu, lakin fasilədən sonra 4 top vurub, qalib gəldi. Çempionat uzun marafondur. Həftədə 2 oyun keçiririk, bizim üçün çətindir. Bəzi meydanlarımızın vəziyyəti ideal deyil. “Səbail”in stadionu bizi çox narahat etdi. “Keşlə”nin stadionunu da qeyd edərdim. Futbolçularımızın zədə almasından qorxuruq. Çempion olmaq çox çətindir.

 

 - Konfrans Liqasında “Qarabağ” Qazaxıstanda “Kayrat”ın qonağı olacaq. Komanda bu mövsüm tilsimi qırıb, qrup mərhələsini adlaya biləcək?

 - Məncə, Qurban Qurbanov bu il çox gözəl komanda qurub. Fikrimcə, bu il maksimum nəticə əldə etmək fürsətimiz var. “Qarabağ”, Qurban Qurbanov və futbolçular da bu məsuliyyəti dərk etməlidirlər. Hesab edirəm ki, bu məsuliyyət hissi ilə səfərə yollanıb, qalib gəlmək lazımdır. Bəli, hesab edirəm ki, belə də olacaq.

 

 - Bu mövsümkü “Qarabağ”ın gücünü necə dəyərləndirirsiz?

 - Məncə, baş məşqçimiz Qurban Qurbanovun da seçimləri keyfiyyətli oldu. Yerli oyunçularımızdan Ramil Şeydayevi qeyd edərdim. Kadi Borges də tez uyğunlaşdı. Bu mövsüm əla komanda formalaşdırıldı. Klubların yüksəliş illəri olur. Burada qurduğu sistemlə komanda formalaşdıran Qurban Qurbanovu təbrik etmək lazımdır. “Qarabağ” özünü yeniləyən, yeni metodları ilə inkişaf edən klubdur.

 

 - “Qarabağ”ın Konfrans Liqasında hansı mərhələyə qədər irəliləyəcəyini düşünürsünüz? Finala yüksəlmək mümkündür?

Birlikdə görəcəyik. Niyə də olmasın?! “Dnepr” Avropa Liqasında bizimlə eyni qrupda idi və finala qədər getmişdi. Niyə “Qarabağ” finala yüksəlməsin? İclasların birində demişdim ki, özümüzü kiçik görməyək, Avropa futbolu oynayaq. Məncə, 1/4 final, yarımfinal oynamağın vaxtıdır və bu niyə də baş verməsin? İnşallah, güman edirəm ki, olacaq.

 

 - Daha böyük hədəflər üçün heyət də güclənməlidir. Qış fasiləsi transfer üçün uyğun zaman sayılmır. Bu baxımdan hansı işlər görüləcək?

 - Mən deyə bilmərəm ki, klub və Qurban Qurbanov futbolçu axtarışındadır. Komanda çox stabildir. Ancaq baş məşqçimizdən istək olsa, klub olaraq addım atmağa hazırıq.

 

 - İşğaldan azad edilən Ağdamda “İmarət” stadionunun bərpa olunması ilə bağlı hansısa işlər görüləcəkmi?

 - Bu, dövlətin işidir. Biz başa düşməliyik ki, “Qarabağ”ın bir sponsoru var – “Azersun”. Bu şirkətdən çalışan 17 min insanın zəhməti ilə klub ayaqda durur. Doğrudan da, “Qarabağ”ı saxlamaq böyük zəhmətdir. Klubumuzun gəliri çox azdır. UEFA-nın gəliri heç vaxt özünü doğrultmur. Ya böyük hədəflərdən, iddialardan əl çəkək və klubun büdcəsini aşağı salaq, yığılan pulları investisiya edək. Amma “Qarabağ” elə bir səviyyəyə gəlib ki, bu, mümkün deyil. Bu komandanı ikinci dərəcəli klub etmək olmaz. Bu gün hamı bilir ki, “Qarabağ” Avropada uğurlu çıxış edir. Ağdama qayıdış dövlətimizin siyasəti və layihəsidir. Avropada davamlı oynayırıq. Bu gün futbolçularımızı Ağdama köçürtmək imkanı yoxdur. Bu gün orada futbolçu və ailələrinə şərait olmalıdılır. Artıq Qarabağımızı almışıq və hələ orada çox işlər görülməlidir. Bu gün dövlətimizin günüdür. İnşallah dövlətimiz işlərini tamamladıqdan sonra biz də töhfələrimizi verərik.

DİGƏR XƏBƏRLƏR
XƏBƏR LENTİ
ÇOX OXUNANLAR
SORĞU
Premyer Liqada mövsümün gedişindən razısınızmı?
 Razıyam
 Narazıyam
 Maraqlanmıram
ARXİV
 jQuery UI Datepicker - Display inline
Copyright © 2018 Sportarena.az
Sayt Five Agency tərəfdən hazırlanmışdır

Ən son idman xəbərlərini səhifəmizdən də izləyin