"Bu komandaya qarşı oyuna hazırlaşmaq üçün bir həftə vaxtımız var idi. Bundan maksimum istifadə etmək istədik. Rəqibin son matçlarını təhlil etmişik, onların son çempionat matçındakı hesabı bizi aldada bilər". Sportarena.az xəbər verir ki, bunu "Qarabağ"ın baş məşqçisi Qurban Qurbanov Bakıda İsveçrə "Sürix"inə qarşı keçirəcəkləri UEFA Çempionlar Liqasının II təsnifat mərhələsinin ilk oyunundan əvvəl mətbuat konfransında deyib.
50 yaşlı mütəxəssis yaxşı komandaya qarşı oynayacaqlarını bildirib: "Sürix" fərqli sistemlə çıxış edir. 90 dəqiqə meydanda diqqətli olmalıyıq. Biz rəqibi tam yaxından tanımırıq. Oyunun gedişində tanımağa başlayacağıq. İsveçrə çempionuna qarşı oynayacağıq. Sona 4 tur qalmış çempionluğu təmin etmişdilər. Bu da onların potensialında xəbər verir. Müdafiədə həddindən artıq diqqətli olmalıyıq. Rəqibin əks-hücumlarına da hazır olmalıyıq".
Qurbanov "Sürix"in baş məşqçisi Franko Fodanın təcrübəli mütəxəssis olduğunu söyləyib: "O, uzun müddət Avstriya millisinə rəhbərlik edib. Avrokubok oyunları üçün böyük təcrübəyə malikdir. Hiss olunur ki, öz sistemlərindən əl çəkmir. Yeni baş məşqçi komandanı həm 4-lü, həm də 5-li müdafiə sistemində oynadır. Avropadakı klublar gedən oyunçuların yerini doldurmaqda çətinlik çəkmirlər. Aparıcı oyunçuları getməsəydi belə, onlara qarşı inamla çıxış edəcəkdik. Bizdə onlara rahatlıqla qalib gələcəyik düşüncəsi yoxdur. Foda bəlkə onları daha da stimullaşdırıb. Əsas qol silahları komandadan ayrılsa da, hücum potensialları böyükdür".
Baş məşqçi braziliyalı yeni transfer Julio Roman haqqında da danışıb: "Onun vəziyyətinə bir gün baxa bildik. Bunadək Marko Yankoviçi də transfer etmişdik. Əlavə bəzi mövqeləri də gücləndirməyə ehtiyac var. Gətirdiyimiz oyunçuya desək ki, Patrik Andrade kimi oynamalısan, ondansa gətirməmək yaxşıdır. Roman fərqli futbolçudur. Onun üstün cəhətlərindən yararlanmağa çalışacağıq. Buraya gələn futbolçunun ustalıq səviyyəsini daha da yaxşılaşdırmağa çalışırıq. Avropadan gəlməsinə baxmayaraq, Çempionlar Liqası təcrübəsi tam başqadır. Bu turnirə uyğunlaşmaq o qədər də asan deyil".
Təcrübəli mütəxəssis komandada arxayınlığın olmayacağını sözlərinə əlavə edib: "Çempionlar Liqasının nə dərəcədə ciddi turnir olduğunu bilirik. Bu, bütün turnirlərdən fərqlənir. Həm gərginlik, həm fiziki, həm psixoloji yorğunluq olur. Çox istərdim ki, futbolçularım sabah əvvəlki oyundan daha yaxşı çıxış etsinlər".
Qurbanov sabahkı qarşılaşma üçün biletlərin əksəriyyətinin satılmasına da münasibət bildirib: "Bu, azarkeşlərin bizə olan inamını göstərir. Üstünlüyümüz odur ki, Bakıda, dogma fanatlarımızın qarşısında oynayacağıq. Həddindən artıq motivasiya futbolçuya pis təsir edə bilər. Ən böyük narahatlığım da budur. Sabahkı görüşdə şansları bərabər sayıram. Futbolçu azarkeş, kütlə qarşısında böyüyür. Çünki daha istəkli, bacarıqlı, məsuliyyətli olur. Çempionat oyunlarımızda da çoxlu fanatların olmasını istəyirəm. Kütlə qarşısında oynamaq futbolçunun məşqlərə, oyunlara yanaşmasını ciddiləşdirir. Bizim azarkeşlərimiz bir nömrədir. Ötən matçda da bunun şahidi olduq. Hətta məğlub olsaq belə, çalışacağıq ki, tərəfdarlarımız o mübarizəni, istəyi görsünlər və razı getsinlər".
Qeyd edək ki, iyulun 19-da Tofiq Bəhramov adına Respublika stadionunda keçiriləcək qarşılaşma saat 20:00-da başlayacaq. Cavab matçı iyulun 27-də olacaq.