Dünya Fudokan Federasiyasının Azərbaycan Respublikasında rəsmi və səlahiyyətli nümayəndəliyi, Qusar rayon Gənclər və İdman İdarəsi, Qusar rayon Olimpiya İdman Kompleksi, Dövlət Turizm Agentliyi və Şahdağ Turizm Mərkəzinin birgə təşkilatçılığı ilə Fudokan idman növü üzrə Qusar rayon şəhidlərinin əziz xatirəsinə həsr edilmiş açıq Respublika turniri keçirilib.
Sportarena.az xəbər verir ki, şəhid ailələri, qazilər, dövlət rəsmiləri və bir sıra şəxslər fəxri qonaq qismində tədbirdə iştirak ediblər. Tədbirin təntənəli açılış mərasimindən öncə Dövlət Himni səsləndirilib və şəhidlərimizin xatirəsi bir dəqiqəlik sükutla yad edilib.
Dünya Fudokan Federasiyasının Azərbaycan Respublikasında rəsmi və səlahiyyətli nümayəndəsi Vüsal Abdullazadə, fudokan üzrə rəsmi nümayəndəliyin vitse-prezident Aqil Gözəlov, təşkilatçılar, rayon rəsmiləri, şəhid ailələrinin üzvləri, qazilər, I və II Qarabağ müharibəsi veteranları çxış edərək yarışın məqsədi, əhəmiyyəti haqqında məlumat verib , şəhid ailələrinin və qazilərin daim ölkə rəhbərliyinin diqqət və qayğısı ilə əhatə olunduğunu qeyd edib və yarış iştirakçılarına uğurlar arzulayıblar.
Turnirdə Bakı, Sumqayıt Qusar, Xaçmaz, İsmayıllı və Gəncə şəhərindən olan komandalar iştirak ediblər.Yarışda uşaqlar, yeniyetmələr və gənclər arasından 200-ə yaxın idmançı qalibiyyət uğrunda mübarizə aparıb.Komanda hesabında Fudokan Mərkəzinin İdmançıları 1-ci yerə, Qubadlı Komandası 2-ci yerə və Qusar rayon komandası 3-cü yerə layiq görülüblər. Qalib idmançılar şəhidlərimizin əziz xatirəsinə həsr edilmiş medal və diplomla mükafatlandırılıblar.
