"Biz də istəyirik ki, Gəncədə oynayaq" - AÇIQLAMA

11:56 5 Avqust 2022

"Doğma komandamda qaldığım üçün sevincliyəm. İllərdir ki, “Kəpəz”də oynayıram. Klubumuz elitaya yüksəldiyi üçün iki qat gözəl hisslər keçirirəm”.

Sportarena.az xəbər verir ki, bu sözləri "Kəpəz"İn futbolçusu Əli Səmədov klubun mətbuat xidmətinə açıqlamasında deyib.

Gənc yarımmüdafiəçi Premyer Liqaya hazırlıqları haqda danışıb: "Hər şey qaydasında olub. Təlim-məşq toplanışını Bakıda keçdik. Heyətimiz yenilənib. Uşaqlar yavaş-yavaş komandaya uyğunlaşırlar. Təcrübəli və gənc futbolçularımız var, komandaya legionerlər də cəlb edilib. İlk gündən hamı istəklidir. “Kəpəz”də oynamaq başqadır və hamı bunun fərqindədir. Əlavə məsuliyyət tələb olunur”.

O, komandanın Gəncədə oynaya bilməyəcəyi barədə isə bunları deyib: "Bu qərar həm bizim, həm də azarkeşlər üçün yaxşı xəbər olmadı. Buna görə edilən etirazlar da başadüşüləndir. Fanatlar biz futbolçulara da müraciət edirlər. Biz də istəyirik ki, Gəncədə, futbolsevərlərimizin önündə oynayaq. Çünki doğma meydan və azarkeş amili bizə əlavə güc verir. Ümid edirəm ki, bunun bir yolu tapılar və tezliklə Gəncədə oynayarıq”. 


Digər xəbərlər

Xəbər xətti